افكار جديده لتقديم الفواكه

تدوينة اليوم خفيفة  فرح  

بأعرض بعض الأفكار الجميلة لتقديم الفواكه 

الفواكه من الأساسيات عندي في نظامي الغذائي ، أكلها مع الفطور أو لحالها بين الوجبات ..

وأعتبرها من الضيافه الأساسية بعد لو جاني ضيوف

الناس تسوي حلى وقهوه وأنا أحط فواكه هههههه ،

أتوقع السبب لأني ما أحب الحلى الكثير بسبب أني ما أشرب قهوه عربيه معه فيصر الكيك والحلى سكره مره مركز بالنسبه لي فأكتفي بكم ملعقة وما أكمل.. لذلك احتاج شي حالي اتونس عليه لكن مو مركز ..

المهم بما أني لي علاقة وثيقة بتقديم الفاكهه أحب أنوع في طرق التقديم وأنفذ أفكار جديدة وحسيت أني طبقت عدد لا بأس به من أفكار التقديم وتستحق الجمع والعرض في مدونتي

أهم نقطة عندي أن التزيين بالفاكهه مايكون على حساب أكلها ،

يعني ما أزين بطريقة تجعل الفاكهه مجرد منظر يصعب أكله، ولا أحب الطرق اللي يكون فيها كمية كبيرة من الفاكهه غير مستخدم ..

فاستعدوا ، جهزوا أشياءكم

واستمتعوا بالتطبيق

مكعب الفواكه

هذي الطريقة مثيرة للانتباه وتعطي جو راقي لأي طاولة خاصة لو المناسبة اجتماع وقت الظهر والعصر أو على الفطور ..

طريقتها بسيطة نقطع الفواكه مكعبات ونصفهم مثل الصوره فوق بعض،

ممكن تنوعون في الفاكهه أكثر من نوعين ،

الكيوي والأناناس والبطيخ والشمام والمانجو أنسب شي لمكعبات الفواكه ..

في الصورة أنا استخدمت بطيخ وشمام

 

 أعواد الفواكه

هذي مناسبه جدا لأيام الشواء تطقيم مع أسياخ اللحم هههه ،

يعجبني في فكرة الأعواد انها تنفع للرحلات ، ماتحتاج صحون ولا سكاكين ولا شوكات ولا حاجة ..

نقطع أي نوع من الفاكهه وندخلهم في أعواد الشواء ، اختاروا أعواد قصيرة أجمل ، ونصفهم في صحن أو علبه وناخذهم لأي مكان ..

في هالصورة كنت أعرض أفكار لتقديمات بسيطة لوقت مشاهدة التلفزيون ومن ضمنها قطع فراولة مع مارشملو في أعواد وحطيتهم داخل كاس في أسفله شوية نوتيلا

وردة المانجو

طريقتها سهله جدا بالرغم من أن شكلها يوحي انها صعبه ..

أولا قشرت المانجو بأداة التقشير ، وبعدها بنفس الأداة قشرت داخل المانجو وكأني أكمل تقشير ، بحيث يطلع لي شرايح رقيقة ..

بعدها ألف الشرائح فوق بعضها على شريحة شريحة بشكل رول لحد مايصير عندي رول كبير

بعدين أوقف الرول بالطول وأثبت أسفله بأعواد الأسنان بحيث مايتفرق عن بعض ، بعدين أفرق الجزء العلوي من الرول لحد مايظهر شكل الوردة ..

هذي من المرات النادرة اللي يكونن فيها الفعل أسهل من الكلام ههه

تنفع مع الخوخ أيضا بس ماسبق جربت ، اتصور بتكون حلوه خاصة ان اطرافها بتصير لون قشرة الخوخ ..

باجربها ان شاء الله بالخوخ إذا صار عندي..

كرات الفواكه

هذي من أجمل الأفكار بالنسبه لي ، نبحث عن بطيخه صغيرة أو ممكن نستبدل البطيخه بأناناس أو شمام ،

نقطع الجزء العلوي من الأناناس أو البطيخ أو أي فاكهه ، ونبدا نحفر بالأداة الدائرية لحد مانفرغ الفاكهه ..

هذي الأداة الي أقصدها 

طبعا بيتبقى بقايا ماصارت على شكل دوائر ، استمتعوا بأكلها وأنتم تقطعون ههههه < عطيتكم حل في حال راحت عن بالكم ..

وبعدها نرجع الدوائر داخل الفاكهه المفرغة ،

ممكن نضيف عليها دوائر من فاكهه ثانيه أو نضيف أي فاكهه صغيرة على شكل دائرة مثل التوت الأزرق أو العنب أو الكرز ..

وممكن وضع الدوائر في كاسات وتقديمها بكميات فردية مع عود لطيف للأكل..

 عمارة البطيخ

مدري وش أسمي هالشكل ما طلع معي إلا عمارة ههههه

قطعت بطيخ شرايح ، وبعدين بأداة تقطيع الكوكيز اخترت شكل نجمه وقطعت بها شرايح البطيخ ، ممكن نستخدم دائره أو أي شكل ، بس أنا حبيت النجمات عشان تعطي تأثير زوايا جميلة وغريبة إذا صفيتها فوق بعض..

لكن لو بنحطها بشكل عشوائي في الصحن أتوقع شكل القلوب يكون مره لطيف

  

دنبو بطيخي

هذي شوي استهبال ههههه ، بس مره كنت جالسه ونطت فبالي فكره من اللا مكان اني اروح وأصنع دنبو من البطيخ ..

الفيديو واضح فيه كيف سويتها ، قطعت الجح مربع واحد صغير وواحد كبير و٤ مستطيلات ، وثبتهم في بعض بأعواد الأسنان ،

العيون سويتها بمصاص دخلته بقوه لحد ماطلع من الجهه الثانية وسحبته وصار فيه فتحه للعيون ، والفم بسكينه نحيفه ..

Video Player

الصدق هذا سويته بس عشان أصوره مو تقديم لأحد ، وكنت متحسفه آكله بعد بس البطن فاز في النهاية هههه

 ايسكريم البطيخ

نقطع بطيخة من النص، وبملعقة الأيسكريم نحاول نغرف من البطيخ ، حاولوا تخلونها دائرة كامله حتى تعطي انطباع وكأنها آيسكريم ..

  

 الفراولة الطويلة

هذي شفت فكرتها أظن في جوديفا لكن زدت عليها موز وكيوي،

نقطع أكثر من فراولة شرايح ونبدا ندخلهم حسب الحجم من الأكبر للأصغر ، يعني العود الواحد يكون فيه أكثر من فراولة بس مايكون باين كأنها وحده طويلة .. وممكن بين الشريحه والثانية نحط موز أو كيوي أو نكتفي بالفراولة ..

بعدين حطيت في كيسه صغيرة شوية نوتيلا وقصيت قصة صغيرة في طرف الكيس من الزاوية بحيث تطلع النوتيلا من الفتحه وتصير زي الخيط وزينت بها الفراولة ..

ممكن تستبدلون النوتيلا بشوكولاته ذايبه عشان اذا بردت تجمد وتصير ثابته في مكانها ..

الشوك اللي بأشكال تحصلونها هنا

  

أتمنى استمتعتوا بالموضوع ، ووروني تطبيقاتكم على بريد الأصدقاء أو أي أفكار حلوه نفذتوها في تقديم الفاكهه وأعرضها لكم هنا في التدوينة مثل التدوينات الماضية ..

أحبكم جدا ودمتم بالقرب

وجبات خفيفة  

     شكرا لزيرتكم مدونتي